E02,E07 | 娛樂
江欣燕 福祿壽：我鍾意扮
平日面對一張張繃緊的撲克臉，突然見到福祿壽扮「Under Girls」頓時如獲甘露！曾幾何時，江欣燕扮梅艷芳連阿梅都話似，令人捧腹！就知道扮並非純為無聊而搞笑，而是如俄國戲劇大師斯坦尼斯拉夫斯基的理論一樣，他們是追求舞台上重現現實。
李思捷唱K練奇技
扮四大天王扮到街知巷聞，李思捷扮盡港產歌手可謂Easy Job，可惜香港這個怪Market容納不到他這類性格藝人，任憑其神技在YouTube早已熱爆，仍不見得他是幸運的一群。幸而《荃加福祿壽》令思捷的生活起了變化，人紅了，有關其家底及感情生活亦被連根拔起，他沒有驚、沒有亂，像舊日一樣笑看風雲，因為他不覺得行過霉運：「呢半年，出邊不時有Job接，真係諗都冇諗過，公司將我包裝做扮能手係成功，講真我依家登台出騷仲多過拍劇，當然賺錢會比以前多好多啦！」
拒發明星夢
很多人整天都發巨星夢，但樂天的思捷知道諗得太多是傻仔行為：「唔會蠢到Set一個時間聽日就要紅，一日得24小時，唔夠用o架！唔好咁傻啦！與其諗無謂，不如Plan聽日點做好仲好！我唔發白日夢o架！」要扮到學友的神態或哥哥的柔情不算難，但思捷連聲線也學到十足，他笑言全拜一部卡拉OK機所賜：「14歲陣，外國生活我冇咩娛樂，屋企人就買部卡拉OK機返，我咪日唱夜唱囉！咩《天碟》、《碟聖》幾個月就出一次，我把握時間練晒所有歌。唔知點解，一上咪我就會上個歌手身，一唱就唱到！」
未贏過比賽
不過原來思捷從未贏過任何歌唱比賽冠軍：「參加歌唱比賽我扮哥哥唱歌，咁就死啦！冇晒自己Style，所以一次比賽都冇贏過！冇諗過廿年後會變成搵食工具。」如今思捷不旦要挑戰人肉Hi-Fi，更要扮足老中青男女話題人物，他認為若要臨摹其神髓，方法只得一個：「要扮人扮得似，要將佢動靜同聲線誇張十倍，當然有歌手聲線唔特別，咁我就一世都扮唔到，但亦冇機會扮呢人啦！因為佢唔會紅！」
江欣燕最緊要百變
要數香港的扮能手，絕不能漏掉江欣燕，「欣欣版」祥嫂與梅姐的入型入格，相信在不少觀眾心目中已達神級程度。訪問當日，欣欣化身山寨版林志玲（Chiling），在鏡頭前展示招牌淺笑，入骨程度爆燈！主動要求扮Chiling的欣欣說：「畀人扮Artist唔好介意，有人扮證明你夠Hit！」有人注定吃這行飯，欣欣小學時已發現有聲演二胡的口技，跟妹妹在家中會分飾《山水有相逢》中的黃韻詩與李司棋。扮，就是這樣練成的。
難忘扮梅姐
新秀出身的欣欣自小視梅姐為偶像，不時貪得意模仿對方台風唱腔，有次在化妝間扮時被無監製黃家良碰見，獲賞識的欣欣變成《歡樂今宵》扮御用班底，與梅姐亦從此結下不解緣：「我好欣賞梅姐，佢講說話有種好肯定感覺，私底下我都識佢。（扮過佢幾多次？）太多啦！有一期EYT扮到發憎，有時Repeat得太多都要抖一抖。」
提到另一個經典角色祥嫂，欣欣笑言連祥哥亦曾錯認兩人：「有次我扮祥嫂，化妝間見到祥哥，鄧兆尊介紹我識，我就用祥嫂語氣同佢打招呼，祥哥攬住我條腰同我傾偈，之後祥嫂問佢：『點解唔見你o架？』祥哥好搞笑咁指住我話：『我認錯佢係你呀！』」
唔敢認諧星
對於扮，欣欣認為形似最重要，正所謂無遮無扇神仙難變：「要留意角色特色，眼神、小動作要扮得精細，講態度同Timing要準，之後一、兩個特點放大。」雖然搞笑形象深入民心，但欣欣未有以諧星自居，並認為藝人最緊要百變：「全面藝人應該似舊泥膠，可以Fit In唔同角色！」
後記：一絲不苟變「Chiyin」
江欣燕主動提議模仿台灣第一名模林志玲有備而來，重形似的她出動私伙假髮陰，為跟足對方在按摩產品廣告中大騷長腿的靚Pose，更預先為十隻腳趾掃上靚靚甲油，再加上淺笑及娃娃音，她從頭到腳、從外到內都散發女神氣質，這位「Chiyin」絕非浪得虛名！當日欣欣為盡力蹬直雙腿拍照，更弄至腳趾抽筋，豁出去程度達200分！
阮兆祥模仿靠反差
扮女人，阮兆祥唔似；扮靚仔，阮兆祥都唔似！但為何他能進身扮王之列？正因為他扮得唔似，祥仔才能令所扮的對象無限量變形，這才是其特色。
祥仔怪自己先天不足，孖腸脹卜卜，腰纏重磅脂肪，身形肥過部電單車，所以不能像祖藍駕馭嬌小玲瓏的女性媚態，若然要扮得成功，事前就要做更多工夫：「我每次扮，事前真係要做好多功課做Research，睇晒所扮對象戲同唱歌技巧，然後抽絲剝繭取其重點，呢係要經驗去累積！」
專揀肥仔扮
祥仔自知肥底，扮某類人總是如履薄冰，他一言道出問題癥結所在：「我一世都冇可能扮到掃街茂，佢咁瘦，點扮都唔會似啦！但我覺得就係唔似，扮佢先有反差，觀眾先會睇得開心。」他續說：「不過我通常都會揀番同我體形接近對象，因為我唔敢去冒險，我想有信心先去扮，好似扮陳振聰、洪金寶同Tiger Woods，我覺得真係扮得好似，以Tiger Woods為例，只要搽黑塊面，再整厚雙唇，黐少少化妝棉就搞掂！」
相對昔日《歡樂今宵》年代，香港的扮能手買少見少，盧海鵬、羅浩楷、鄭少秋等亦年華老去，梅小惠及苑瓊丹似在休養生息，扮能手出現青黃不接的現象，「福祿壽」肩負的責任不只是娛樂大家，更需要保存這種表演藝術，祥仔說：「我覺得香港唔可以冇諧星，冇人扮搞笑個壓力煲會爆o架！我覺得我三個係臭皮匠，三個都有唔同搞笑天分，我有唔同長處，集合埋就係最強組合。」
表演咩都殺
談到各人的長處，祥仔自鳴得意說：「我三個都好唔同，思捷扮好細緻，一顰一笑都拿捏得好好；祖藍唔只扮人叻，填詞都好有天分，好多隻歌都由佢填詞，好犀利；我就比較識控制現場氣氛同Timing，令現場觀眾睇得更加過癮，再加上阿姐，我可以完全互補不足。」
大家有否記得祥仔是歌手出身，N年前以氣吞天下之勢，奪得《第二屆全港十八區業餘歌唱比賽》季軍，但昨非而今是，做歌手滑鐵盧，現在換上另一種形式在舞台發光發熱，祥仔從沒有氣餒：「我喜歡表演，無論扮、拍劇、唱歌我都鍾意！我太享受舞台表演，自己亦都好知足，做人唔可以太過貪心。」
王祖藍自豪做女人
扮女人，比女人更女人，除非你是變性人，又或者是泰國人妖吧？連王祖藍也萬料不到自己會如此女人！自命「短人」的他感恩生得短小精悍，拿捏女性的特質更容易。原來祖藍反串的天分，小學時已被發掘：「細細個就好鍾意學燦哥（廖偉雄）扮乜太，藐嘴藐舌！五、六年班，同學就屈我扮聖母瑪利亞懷孕幕，出奇反應極好，我冇咩所謂，永遠男扮女可以笑穿你個肚，女扮男就唧你都唔笑！」
反串有竅妙
先天反串有數，祖藍自言扮女人可以完全不費吹灰之力，做的功課也不像祥仔及思捷的多，出來的Feedback卻最轟動：「我扮始終會扮番自己會似，正如冇理由叫祥仔扮瘦女，因為表演只係兩三分鐘，只要搵到一兩個重點就OK。」講到扮女人，祖藍有如滔滔江水，連綿不絕：「好似扮Lisa S.，就要扮佢高音講英文，熊黛林（Lynn）就要學佢對眼睩得大一大，答問題要一樣答完等於冇答，只要一味睩大隻眼，就會好似Lynn！扮佢時我點解會咁九頭身？多得導演由我條腰，Plan落我隻腳，低炒上去，咁我睇落咪會高囉！其實我依然係一個短人……總之我做功課唔係淨係只睇個對象，係要搵佢可玩性。」
喜自創角色
但祖藍曾認為扮女人會超級惡心：「未出街時，我驚畀人掟番茄，望番自己扮女人個Look，撞鬼你咯！真係好食個妝，原來我係咁索！託賴！」在萬千個女人Look，祖藍認為「慳啦Baby」是其得意之作：「成功係我可以創造一個角色，因為創作勝於模仿，好似盧海鵬同賈思樂蝦仔爹一樣精彩。」搞笑是要有態度的，祖藍賺的不只是金錢那麼膚淺：「我覺得我係賺到一個集體回憶，就好似秋官扮四大天王、阿姐跳熱咖啡、肥姐踩蛋一樣，呢都係70後、80後集體回憶，但近十年好似冇晒，我希望20年後仲有人記得我！我要唔係錢，近排連商場騷搵快錢我都冇接，我要做好呢台戲，放長線釣大魚。」
點評3笑彈
「福祿壽」三子近期憑出神入化的扮絕技Hit爆電視圈，同為扮高手的欣欣對他們有讚冇彈！
阮兆祥
「我同祥仔識最耐，中四參加校際辯論比賽時已經識佢，佢又係新秀出身，合作過好多次，佢好玩得、夠放、轉數快，樣唔靚，但內心好善良，正經唱歌仲好好聽！」
李思捷
「幾年前我一個節目做評判，記得思捷扮阿Lam唱歌，真係好似，扮鄭少秋都好神似！我有睇『Sat in the City』，唔知點解覺得佢個感覺超似鄧藹霖！哈哈！」
王祖藍
「我《同事三分親》同《畢打自己人》合作變熟，佢好乖，係好虔誠教徒，我好鍾意佢，如果老公乖到佢咁就正！祖藍好多才藝，都幾刻苦。」
後記：歌不離口冇你收
「福祿壽」是不可控制的一群，做節目如是，做訪問如是！攝影師要求他們埋位拍照，豈料思捷、祥仔和祖藍似開籠雀喪唱《Lonely》、《怎麼天生不是女人》及《失憶諒解備忘錄》……歌聲震天，連在休息室的阿姐也忍不住出來「裝裝」他們搞邊科！沒辦法，他們表演欲爆棚，天天也過《超級巨聲》的生活。
ArTing
沒有留言:
發佈留言
留個言俾欣欣喇喂~~