C10 | 娛樂
阮兆祥Sing途不順笑出狀元
阮兆祥80年代先後參加新秀歌唱大賽及全港十九區業餘歌唱比賽，似與歌唱發展結下不解緣，但偏偏卻在電視演出發光發亮，成為搞笑icon，07年更憑《溏心風暴》「舅父波」一角贏得無綫台慶最佳男配角，令演藝成績錦上添花，這朵「花」教曉祥仔凡事無絕對，就如當年他未能出其個人大碟，並不代表他自此失去星途，今次對談的老友江欣燕，更為祥仔攞獎滴下安慰之淚。
阮兆祥與江欣燕識於微時，難怪兩人表現得如此合拍！
我的黑暗時代
江 = 江欣燕 阮 = 阮兆祥
江：你係一個豁達嘅人，搞笑節目做得好成功，但你嘅人生路上有冇唔開心過？
阮：嘩！梗係有！97年……係我嘅黑暗時代！
江：輸股票？
阮：唔係！係出唔到唱片！成件事我冇跟人提過，因為太Hurt啦！嗰時我喺無綫做音樂節目已開始搞笑，豁咗出去其實返唔到轉頭，點知嗰時有人搵我出唱片，諗住洗底啦！觀眾好善忘嘅，收埋自己一年，諗住以全新姿態出現啦……我又主持過《新地新地帶》、《勁歌金曲》……都識唔少歌手又幾friend，我咪碌盡人情卡，叫班歌手friend拱照我囉！仲唔掂？
江：咁都出唔到（唱片）？
阮：係間唱片公司嘅問題！當年我搵到張學友、周華健幫我寫歌，草蜢嗰啲唔使講啦！我份人錢就冇乜，但人情就多，啲人都會覺得我祥仔都值得幫，可能我做事有heart，所以全部friend都OK晒！
阮兆祥貪玩地模仿自己參選新秀時的瘦版祥仔。
晴天霹靂
江：呢張唱片都好有吸引力？
阮：咁又點吖……間公司大執位，換咗人做GM（經理），要搵我傾過唱片嘅嘢，佢仲問我可唔可以叫班歌星寫封信，擔保到時一定幫你。
江：咁核突？佢係咪傻架？唔想出咪話唔想出囉！可以婉轉啲講，咁講太傷害性嘞！
阮：嘩……當時我嘅心情，簡直雷電交加，我咁做，你叫我顏面何存呀？件事最後咪不了了之，我哋都解咗約，點知出現另一個機會，無綫監製梅小青打電話畀我。
江：個天都係想擺你喺電視！
執二攤有得着
江：呢行愈做得耐，愈知好多嘢唔可以強求。
阮：係，不過男人做嘢總要有目標！嗰次冇咗出唱片機會，但緊接過嚟嘅，係梅小青搵我返無綫拍劇，喺電視台拍咗好多搞笑、唔搞笑嘅劇，又演出獎門人系列嘅遊戲節目，奠定搞笑icon，直至劉家豪搵我「執二攤」（黎耀祥）演《溏心風暴》嘅「舅父波」，我做咗好多功課，家豪哥都好好，佢好清楚話邊幾場戲好重要，提我要捉得緊，仲好坦白同我講：「如果你係第一個人選嘅話，我就唔會依家（開咗工）先搵你！」家豪哥首選搵祥仔，當然對佢有信心啲，但佢既然搵我呢個第二人選，亦好有責任將好多對個角色嘅分析講我知，講真，我同祥仔係唔同性質嘅演員，演出嚟有意想不到嘅效果，後來我同祥仔傾，都有多謝佢！
江：點多謝佢？
阮：多謝佢病囉！哈哈……如果唔係佢病接唔到呢個劇，我都冇呢個機會攞獎！不過，祥仔都睇得好開，佢都話唔係咩損失，因為佢都有睇個劇，由佢做「舅父波」，都未必係呢個效果，所以，呢件事令我更體會到，二、三攤其實對演員冇所謂！
江：所以你台慶嗰晚攞獎，我都有流咗滴眼淚出嚟！
祥仔憑《溏》劇舅父波一角獲最佳男配角。
欣欣與祥仔是無所不談的好友。
互爆變身進程
阮：其實講番我哋呢班參加新秀嘅藝人，好多之前已經識，好似李克勤、周慧敏咁，欣欣我同你仲要係中四已識，我哋四個已經係「學界四天王」啦！當年喺學界文化係好興唱歌表演，又會互相過對方學校演出，當年克勤已經好勁，趙增熹手琴又好巴閉，當年佢已經跟黎小田學！
江：嗰個年代太多回憶啦……
阮：我喺學界係「陳百強」、欣欣你當然係「梅艷芳」、李克勤係「譚詠麟」，而周慧敏就係「柏原芳惠」！哈哈……當年我喺學界唱嘅第一首歌就係《念親恩》，飲歌嚟架！我又讀和尚學校（男校）喎，未見過女仔架！當年嘅周慧敏個樣好乖……着白裙架！
江：我好羨慕你哋咁精靈，我讀師姑學校（女校），未見過出面世界，好鈍架！
阮：嗰時我見到你，覺得你扮阿梅邊得嚟咁似？當年已經可以扮到依家呢個水準，講真其實你係冇進步過！哈哈……
江：你知我當時係大近視，眼鏡厚到好似玻璃杯底咁，三倍咁厚！我當年發誓，邊個男人見過我呢個樣就要娶我！
阮：我見過呀！我讀書時就識你，梗係見過你嗰個樣啦！同依家比，咁靚，簡直就係Ugly Betty！
江：我以前戴眼鏡啲相都燒晒！
阮：哈哈……從此你就跟我一樣行一樣嘅路。因為我當年都好醜樣，依家靚番好多，以前瘦到好似排骨。
江：係呀！我哋有同學暗戀你，當年啲人以為我係同性戀，所以我一路都冇拍拖。
阮：直至張生（張衞健）啦……我係話張耀榮！哈哈……
欣欣與祥仔最叻扮嘢，尤其扮當紅歌手，包冇甩拖。
去年祥仔（左）在節目《荃加福祿壽》中扮女人，大獲好評。
新秀時代的回憶
阮兆祥參加第二屆全港十九區業餘歌唱比賽，得到季軍，未能順利簽得唱片公司，但獎品中就有一份歌手藝員合約，故祥仔在未經訓練下，便在港台拍劇。由於工作數量不多，維持不到生計，他跟克勤便膽粗粗走上電台電視部抓撈：「電視部一個月得一個騷，一年十二個騷，500蚊一個你話點捱？搭車食飯都唔夠啦！錢我哋就爭取唔到，咪爭取機會囉！我跟克勤都覺得嚟得電台冇理由唔做DJ，所以我哋上訓練班上堂時咁啱撞番『學界四天王』周慧敏，郭晉安都係嗰期，跟住克勤好快就出唱片，我都好羨慕。」
入了無綫後，新秀出身的祥仔，不時會與梅姐等新秀歌手聚會，祥仔說：「梅姐在生時，我哋食消夜都講過新秀應該搞個同學會，大家可以聯繫埋幫社會做啲事，新秀中落選嘅歌手都起『朵』，草蜢、欣欣、周慧敏、克勤都可以獨當一面出嚟做嘢！雖然係講過，但成立一個慈善團體要好多手續，又要搵人做行政管理，都幾麻煩吓，之後又冇人做主動就不了了之，不過，諗番新秀都好多回憶，好開心嘅！」
祥仔在圈中好友眾多，人緣甚佳。
江欣燕、李克勤
採訪：影視組
攝影：沈健程
髮型：Eddy Kwong@Salon Square（阮兆祥）
場地：雋園火煱
********************************************************************************************************************************************************************
掃描版:
※如要轉載任何已加水印的圖片，請留言查詢，或電郵至elvinalism@gmail.com與負責人聯絡；嚴禁加工及編輯以下圖片作其他用途。多謝合作。
(點擊放大)
沒有留言:
發佈留言
留個言俾欣欣喇喂~~