♥ 最新動態 ♥

.7月中開拍新劇《Aerobic Girls舞室保衛戰》。

2011年3月27日

2011.3.27 東方日報: 鄭裕玲紆尊為木村瘋狂

東方日報
C13 | 娛樂

鄭裕玲紆尊為木村瘋狂

鄭裕玲(嘟嘟)予人智慧女性形象,江欣燕(欣欣)則是鬼馬搞笑,性格各異的兩人原來非常啱嘴形。十年前嘟嘟放下高貴形象,與欣欣到日本追擊偶像木村拓哉,之後嘟嘟因為搭飛機重遇木村而不再迷戀,可見她亦有那種幾分鐘熱度的「少女情懷」。

鄭裕玲(左)與江欣燕雖踏入中女之年,但心境開朗,與時下年輕人一樣愛玩自拍。
























江欣燕很欣賞鄭裕玲追求完美的性格。























江:江欣燕 鄭:鄭裕玲


打麻雀悟出智慧

江:我好欣賞你係一個好自由嘅女人,可以完全控到自己嘅人生,我要向你學嘢!

鄭:你都可以架!

江:以前我好依賴性,總係學唔到你嗰種謹慎、對要求嚴謹、又識為自己打算嘅本領,經濟管理又首屈一指,如果我抄到你一成智慧都發達!因為你會好快就知道自己要咩。

鄭:咁你要幾耐先知?其實,呢種你所謂嘅智慧,都可以喺打麻雀度領略!因為打麻雀係計算下一步,從而訓練你喺人生路上計劃下一步。我哋相識喺九十年代嘅《歡樂今宵》,開工後好鍾意約埋打台灣牌,你仲記唔記得?

江:係呀!嗰時係我最近距離接觸你嘅人生,先知道你嘅智慧係點嚟,就係凡事都好認真尋求真相,就算玩都係!我哋唔識計台灣牌啲番數,你會好認真咁打電話畀當年堪稱全港最叻打台灣牌嗰個梁李少霞問,我哋旁邊睇到都會覺得:「使唔使咁緊張?玩吓啫!」

鄭:咁遊戲都要認真,人生可有幾回?

江:我記得嗰年我哋好瘋狂,喺你屋企由農曆年初一打到年初三,三日三夜冇瞓,你個賓妹放完假返嚟仲見到我哋,冇走過,可謂人生最經典!

鄭:我兩個人生經典都交咗畀欣欣你呀。除咗打牌,就係我哋兩個去日本追擊超級偶像木村拓哉!

江:十幾年前嘞!呢個係我永遠嘅記憶!嗰時我見到嘟嘟攞住個拖篋喺日本嘅街頭shopping,我起初都O嘴,但嘟嘟話:「買完嘢可以快啲走,又慳番啲包裝,環保啲,又唔使攞到隻『屐』咁!」我覺得又係喎,咁我咪又拖個篋囉!

鄭:我哋都好鍾意木村,各自shopping完就分開搭的士去木村間餐廳。

江:真係好刺激呀!我哋兩個fans喺香港飛去日本追星!

鄭:仲見到人哋(木村)阿媽做收銀,不停咁影相,餐廳間廁所都影一大餐。聽講佢離婚喎?

江:咦?嘟嘟,你嘅機會又嚟喇!

鄭:哦!我好早已經對佢冇感覺啦!早幾年我搭飛機撞過佢,我坐bussiness,佢都係,全機人等佢一個。上到嚟坐喺我隔籬,點知係佢喎!我當時都冇感覺囉,不過佢的確係好靚仔,佢當年過嚟拍王家衛套戲。

江:當年我覺得木村娶靜香,唉!好失望,結婚喎!依家又離婚!

周潤發牽動人心

江:我好鍾意睇你做戲,我好「大個」就睇你做戲架喇!

鄭:又講啦!人生有幾回吖!戲我就唔拍啦,雖然冇話絕對,但呢一刻都唔喇!邊有拍戲話唔辛苦,嗰種壓力會佔用你全部精神,反正我都做過晒。激情、女強人、傻大姐……

江:但我最鍾意睇你嘅激情戲(偷笑)。話晒當年仲細,未試過太多嘅戀愛滋味。我都係睇你同發仔(周潤發)嘅《網中人》、《親情》啲感情戲同咀嘴戲,先知戀愛原來係咁。究竟你啲戀愛感覺點嚟?

鄭:當年嗰兩套的確係好戲,《網中人》係王晶做編審,又有陳惠民做幕後,不過都走晒。佢哋啲劇本好,好易帶到演員入戲,而且發仔又係一個好好嘅演員,佢唔止要自己好,仲會令到其他演員都要好。

江:但始終最吸引係你哋條戀愛線,依家冇演員拍得番!

鄭:我當年豁出去啦!我要把握機會,因為我喺佳視(已結業電視台)出嚟,無綫執番我,所以我更加要爭氣,把握個機會。其實除咗發仔,黃子華都係一個好夾嘅拍檔,當年《男親女愛》都好好收視。呢啲對手,好似發仔、子華咁,真係一生人一次咋!

江:我哋知你拍嘢好投入,當年你同萬子(萬梓良)拍《流氓大亨》嗰場「So What」好經典呀!萬子嗰啲鼻涕係咪真架?你頂得順冇?

鄭:我冇頂唔住,鼻涕都係真。嗰場戲係萬子自己寫,佢寫咗一個通宵,仲打電話畀我叫我第二朝早少少返廠對稿,佢讀一次我聽,問我覺得好唔好,佢好緊張呢場戲!雖然佢份人比較肉緊,係有啲激進,但佢出發點係好!


周潤發與鄭裕玲被視為螢幕完美組合。


















鄭裕玲大讚黃子華有才華。



















名成利就亂揮霍

江:嘟嘟你萬人景仰,好似好完美,但總有不足之處,恕我直言,你覺得自己有冇缺點?因為我有一次好奇怪嘅回憶,就係有次同你食飯,你可以喺人哋興高采烈時企起身拜拜,話走就走!

鄭:咁係吖嘛!又再講?人生有幾回,時間好寶貴。依家咁多天災,人要為自己開心而活,我覺得今日好盡興就返屋企休息,聽日再嚟過。

江:仲有咩缺點?

鄭:九十年代紅嗰陣,就會亂使錢,淨係買衫、手袋嘅錢都六位數字。在我鄭裕玲嚟講,我已經覺得好揮霍。依家諗番,其實又唔使,我依家用嘅手袋都係幾百蚊咋!

鄭裕玲的裸女圖深得劉詩昆欣賞。

興趣多填滿時間

江:我哋因為《至八會》再將友情昇華,我哋又學畫畫啦,你有兩幅都畀劉詩昆老師買咗!其中一幅裸女圖,劉老師以為你對住鏡畫出嚟架!哈哈!

鄭:我從來冇諗過自己以作者身份出書展,我已當自己半個畫家。最近我見過顧老闆(顧紀筠),佢學紙黏土,我又想學,因為佢話個老師月底會嚟開班。我依家人生好充實,有電視台一份工,得閒就做運動、學畫畫、學紙黏土,有時間就去旅行,已經填滿我嘅時間,我好滿足。


鄭裕玲的裸女圖深得劉詩昆欣賞。














書中自有黃金屋

嘟嘟閒時愛看多種類型書籍尋知識,唯獨投資、經濟論的書不是她所好。嘟嘟說:「自己投資都試過損手爛腳,真係好有經驗,仲使睇咩!」

嘟嘟最近迷上瑞典作者史迪格拉森的《龍紋身的女孩》,故事中的女主角性格特別,是近年大熱瑞典小說的「千禧三部曲」,但跑新聞出身的史迪格拉森卻在《龍》出版前去世。其偵探小說出名營造陰沉氣氛,是嘟嘟近期所追捧的新書。

而欣欣則愛看有關靈魂進化的書籍,最近她看了《靈魂占星》,當中提到「北交點」,以個人星座計算出來。欣欣說:「我睇呢本書時,作者話『北交點』即係盲點,經常出現喺人生每個階段,要用思想、行為去應變,將性格上弱點擺脫,我每遇到人生盲點,就會攞出嚟睇。」


兩人性格各異,但有說不完的話題。
















嘟嘟與欣欣近期愛看的書籍。
















文:影視組
攝:劉志源
服裝:JoanDavid(鄭裕玲)
場地:L16 CAFEBAR

***************************************************************************************************************************************************

掃描版:


※如要轉載任何已加水印的圖片,請留言查詢,或電郵至elvinalism@gmail.com與負責人聯絡;嚴禁加工及編輯以下圖片作其他用途。多謝合作。
(點擊放大)

沒有留言:

發佈留言

留個言俾欣欣喇喂~~