2011.4.2 頭條日報 《頭條獨家: 直擊新劇「荃加福祿壽探案」》

頭條日報
P32  |   娛樂  |   頭條獨家

阿姐 狂放蚊兼偷食 
直擊新劇 《荃加福祿壽探案》老太婆上身    


無綫節目《荃加福祿壽》靠阿姐汪明荃、王祖藍、阮兆祥及李思捷扮嘢出位，節目添食又開演唱會外，最近電視版《荃加福祿壽探案》亦正式開拍。故事背景是五、六十年代，演員繼續扮鬼扮馬去查案。早前該劇在永利街取景，各個演員造型都相當出位，貪靚的阿姐更扮成80幾歲老太婆出現。不過出名專業的阿姐，唔知係咪太投入角色關係，竟然不停打呵欠和食零食，就算休息時都好似老太婆上身一樣，扶住柺杖來行，唔知真係以為佢係個普通阿婆！

採訪：曾志恆



※一把年紀的汪阿姐，扮阿婆入型入格，甚至連途人都認不出她本人，而拍攝當日，阿姐連翻偷食兼整理假牙，連行徑都十足一個老太婆。

一向準時的阿姐令合作者都不敢遲到，不過早前《荃》劇開鏡當日，李思捷竟然遲到要阿姐等他，更被祖藍和祥仔取笑是「捷爺」，秋官鄭少秋上身，因只有秋官才敢在阿姐面前遲到。當日大隊晨早9時在永利街拍攝，今次思捷都準時出現，反而阿姐似乎唔多在狀態。

「捷爺」要阿姐等

63歲的阿姐當時以80幾歲的老太婆look出現，不但化妝造型做到足，連金牙都黐埋，唔知係咪因為造型複雜，要好早化妝關係，搞到阿姐等埋位時不停打呵欠。阿姐可能為了唔想瞓着，就算黐了金牙，都不怕麻煩不停食嘢，一時又咬餅乾，一時又食粟子，好似食極都未飽一樣。

不過，其他演員好似王祖藍和祥仔都唔見得輕鬆，祖藍除了要扮個盲阿伯之外，竟然有動作場面，要飛身撲落地，仲要俾祥仔和思捷壓上面。而祥仔就要扮哨牙佬，搞到他唔多習慣，講嘢都要成日就住。雖然思捷造型上算是無咁辛苦，只是戴假髮扮馬姐，但就要攬住江欣燕扮跳舞，由於要遷就鏡頭，又驚整到欣欣，結果要NG幾次導演先收貨。

※祥仔剔牙

※李思捷江欣燕跳舞

※由於江欣燕和李思捷有跳舞戲份，所以特別穿上波鞋以防扭親。

扮鬼扮馬查案

《荃》劇故事跟節目完全沒關係，大家不會見到大受歡迎的環節《Sat in the City》中「Handela Baby」等角色。故事是講阿姐是私家偵探社社長，收留了祖藍、祥仔和思捷等人幫她查案，所以劇中為了掩飾身份，他們都會經常扮鬼扮馬。該劇會拍到5月中，還會多個造型亮相，相信一班演員會有排辛苦啦！

※祖藍飛身博到盡

※阿姐扮起阿婆來似模似樣，連跑步都一臉老態。

※祖藍要畀祥仔和思捷壓住下身認真辛苦。

*************************************************************************************************************************************

掃描版:

※如要轉載任何已加水印的圖片，請留言查詢，或電郵至elvinalism@gmail.com與負責人聯絡；嚴禁加工及編輯以下圖片作其他用途。多謝合作。

(點擊放大)