2011.4.8 頭條日報《收錢減肥任人拮 江欣燕速減10磅贅肉 》

頭條日報
P86 | 娛樂 | 頭條獨家


收錢減肥任人拮 江欣燕速減10磅贅肉

減肥係女人一生大業，個個都千方百計去保持窈宨身材做「索女」，而江欣燕就以代言人身份，幫悅榕莊拍攝「穴位埋線」療法廣告，有錢收，又有得減肥，難怪欣欣激讚「好嘢！」本報直擊埋線過程，當針拮入大髀內側和肚皮時，欣欣驚青到呱呱叫，不過，緊張過後，五臟六腑都得到調理，為她操刀的余浩成醫師說：「你子宮同身體機能都會有改善，懷孕機會比以前高！」雖然係有意外收穫，但還未有計劃生仔的欣欣揚言要加強預防措施，免得搞出人命！

採訪、攝影：方騫平

坊間有千百種減肥方法，有人唔要有副作用，找中醫師幫忙在不同穴位施針，之前就傳過楊千嬅花4,000蚊植入羊腸線，拮走Pizza面，原來呢個係針灸減肥法升呢版，把可被人體吸收的羊腸線透過針埋入穴位內，讓羊腸線在兩星期內全日按壓穴位，達致減肥及調理身體效果，促進新陳代謝，擊走脂肪。

針灸調理身體

被欽點當悅榕莊代言人江欣燕最想減肚腩和大髀贅肉，首次接觸療法的欣欣不停追問醫師，連珠發炮追問十多條有關穴位減肥的問題，只見醫師細心解說，「條羊腸線植入穴位？咁咪會感覺到條線囉？」但原來都係諗多咗，記者親證那條只有吋半長的羊腸線拮入她大髀內側後，只有一點紅，伸手摸也感覺不到。

被人拮針，欣欣驚到震，但她笑說：「其實唔算痛，只係我緊張啫，有些麻痹感，同針灸無分別，呢個療法唔只可以減肥，仲可以調理到身體，同做減肥機係兩回事，值得推介，我已成功踢走腰腩贅肉，大約輕了10磅。」收咗錢免費減肥，欣欣即放下心頭大石，做完「穴位埋線」後更拉隊食快餐，拿起芝士漢堡大口咬，使唔使咁得戚先！


※江欣燕首次接觸「穴位埋線」療法，不停向醫師討教。

※欣欣以代言人身份減肥，修身兼賺錢。資料圖片

※江欣燕專心聆聽醫師解說。

※醫師將針拮入肚皮時，欣欣曾緊張得呱呱叫。

※完成減肥療法，欣欣即開懷大吃。

***********************************************************************************************************************************

※如要轉載任何已加水印的圖片，請留言查詢，或電郵至elvinalism@gmail.com與負責人聯絡；嚴禁加工及編輯以下圖片作其他用途。多謝合作。

(點擊放大)

掃描版:

2011年新一輯悅榕莊平面廣告 (版本1)