2011.8.13 蘋果日報 《有話兒：蝦仔阿珍20年笑語 》

蘋果日報
C19  |   娛樂名人


有話兒：蝦仔阿珍20年笑語    

近年吹起一股集體回憶風，每個年代和不同環境成長的人，都有他們的共同回憶，見到賈思樂和戚美珍，大家會想到甚麼集體回憶？80後可能冇乜印象，60、70後應該有少少記憶，如果盧海鵬用押韻的語氣說：「記得睇蝦仔爹哋，你一定唔會過時。」加上林建明束高髻下巴有粒大痣及穿上旗袍的造型，追住鵬哥打打鬧鬧的情景，讓人捧腹大笑，就變成令人懷念的趣劇《蝦仔爹哋》。撰文：胡比

經典處境劇《蝦仔爹哋》83年在無綫《歡樂今宵》中播出，隨即大受歡迎，連續播了九年，更獲封健力士世界紀錄大全最長壽短劇，飾演蝦仔和阿珍的賈思樂（Louie）與戚美珍坦言沒想過會如此幸運，入行不久便遇上這難得的機會，拍住扮嘢高手盧海鵬與林建明（沙姐），心情既驚且喜，20多年後，再三回想就覺得歡樂的時光過得特別快。

收益撥捐心晴行動

2011年，Louie決定將《蝦仔爹哋》搬上舞台，下月20至23日在伊館與觀眾一起集體回憶，帶來一個全新的《蝦仔爹哋》，溫情加音樂，變成一個感動觀眾的趣劇，部份收益撥捐「心晴行動慈善基金」，用輕鬆的劇情與歌聲感染大家，以歡笑聲帶出抑鬱症其實並不可怕，Louie說：「香港有好多人都有抑鬱症，十個人會有兩個人患上，可能連佢哋自己唔知道，我、沙姐同陳奐仁都曾經患過抑鬱症，只要肯同人講，正面去面對，no big deal。」

Louie與阿珍提起以往合作的趣事便滔滔不絕，隨便說說已令兩人眉開眼笑，Louie說：「鵬哥最鍾意搞我，明知我中文唔好，成日爆肚，搞到我唔記得啲稿，我接唔住啲對白佢就開心，見我就嚟浸死，又救番我上嚟，啲觀眾就最鍾意睇呢啲，仲有鵬哥啲金句，人哋編劇寫好畀佢，佢實改o架，改到我哋都忍唔住笑，佢真係金句王鼻祖。」

鵬哥金句引人發笑

當年《蝦》劇一開場，必定見到飾演矇豬眼的鵬哥，氣定神閒以他獨特押韻的語氣，對着鏡頭說出自創的金句，引人發笑，獨他繼續扮cool，鵬哥的功力真的深不可測，Louie說：「呢個就係盧海鵬，天生就係喜劇演員，就算畀啲垃圾稿佢，佢都可以變成搞笑嘅稿。」現今娛樂圈也有兩個金句王，黎明和古巨基，不過他們都好像欠缺了鵬哥的喜劇天份，娛己還未做到娛人。

難忘沙姐惡鬥鵬哥

戚美珍當年剛入行，就遇上沙姐與鵬哥這對鬥氣寃家，阿珍笑說：「佢哋有時喺個劇度鬧交，鬧到真嘅一樣，鵬哥激到沙姐嬲嬲哋，沙姐就會打鵬哥，試過沙姐好大力咁一個手袋車落鵬哥個頭度，我哋只可以企埋一邊睇戲，睇吓佢哋點樣收科囉。」沙姐在劇中叫大白鯊，果然不是浪得虛名。

為公筷嗌大交

阿珍學懂執生，就是這樣一點一滴累積回來。鵬哥和沙姐兩個前輩在台前鬥到未夠喉，台後繼續針鋒相對，阿珍說：「佢哋一見面就係鍾意互窒，鵬哥見到沙姐第一句就會問佢『你仲未死咩？』沙姐就應佢『你都係』，真係俾佢哋兩個笑死。試過成班人一齊食飯，有公筷，但鵬哥成日唔記得用，跟住沙姐就開始鬧佢，然後就鬧到面紅耳熱，其他人咪繼續食嘢同傾偈，唔會理佢哋，等佢哋鬧完又冇事，繼續食飯。」Louie笑說：「我哋有時真係唔知佢哋鬧交幾時真幾時假，但好多時都係鵬哥收聲先，男人點都會讓女人。」真假難分，豈不是演技最高境界？

「當咗佢哋係家人」

趣劇《蝦仔爹哋》對於觀眾來說，可能只是茶餘飯後的一個娛樂節目，睇完笑餐飽，沒甚意義，但對Louie和阿珍來說，卻有深層意義，Louie表示雙親很早離世，劇中飾演他父母的盧海鵬和羅蘭，就如他的親父母，Louie說：「合作咗咁耐，真係當咗佢哋係家人，以前喺電視城晚晚都食完飯先開廠，就算o依家唔係成日見，都會約佢哋食飯，仲係叫佢哋做阿爸阿媽，一見面就會有種特別開心嘅感覺。」

EYT總動員演出

阿珍也與《蝦仔爹哋》一起成長，她說：「我嗰時入行冇耐，乜都唔識，但佢哋都好照顧我，係我成長過程一部份，今次做舞台劇，就好似屋企人要一齊做一件事咁，唔會計較。」

《蝦仔爹哋》是他們的另一個家，《歡樂今宵》（EYT）就是他們龐大的家族，當他們決定搞舞台劇，家族成員曾志偉、毛舜筠、米雪、關菊英、廖安麗和江欣燕等都一呼百應，雖然《歡樂今宵》早就曲終人散，各奔前程，但情卻常在人心。